Мемлекет басшысы 2-маусым күні жаңадан ашылған Ботаникалық бақты аралап көрді.
Бақтың жалпы аумағы – 92 гектар, оның 63 гектары – жасыл алап. 17,7 гектар жер ғылыми аймаққа арналған. Мұнда өсімдіктерді зерттеу, көбейту және жерсіндіру бойынша ғылыми-зерттеу жұмыстары жүргізіледі.
Баққа 34 мың ағаш, 86 мың бұта отырғызылды. Айта кету керек, Астананың географиялық, климаттық жағдайы көптеген ағаш-бұталардың өсіп-жетілуіне келмейді, алайда Астана қаласының әкімдігі мен BI Group компаниясының бірлескен жұмысының арқасында, бұл жердің топырағын жақсарту бойынша үлкен жұмыстар жасалды.
Кіреберісте демалушыларды арка, содан соң фонтаны бар жасанды суайдыны арқылы өтетін көпір (көлемі 45 мың ш.м.) қарсы алады. Ал қыста бұл жер мұз айдыны болады. Арка астында бұл бақтың ашылған күні жазылған ескерткіш бар, онда латынша: Botanikalyq saiabaqtyn negizin qalaǵan Qazaqstan respýblikasynyń prezidenti - Elbasy N. Á. Nazarbaev деп жазылған.
Қазір мұнда спортпен айналысып, серуендеуге болады. 11 км вело және 10,5 км жүгіру жолы бар. Аумағы 1,6 мың ш.м екі жылыжай және 21 спорт және балалар алаңы салынды. Бақтың құрылыс жұмыстары 2012 жылы басталған еді, сонда Президент болашақ ботаникалық бақтың аумағына ағаш отырғызуға қатысқан.